Sambært § 6 í stýrisskipanarlógini verða løgtingsmenn valdir fyri 4 ár í senn. Tó kunnu løgmaður ella Løgtingið sjálvt, nær ið vera skal, taka avgerð um at skriva út nýval. Løgmaður kann koma við einari fráboðan um, at hann skrivar út nýval, meðan Løgtingið kann taka avgerð um hetta við einum uppskoti til samtyktar sambært § 48 í Tingskipanini. Gamla tingið hevur fullar heimildir, til nývalda tingið er sett. Tað áliggur løgmanni at skipa so fyri, at nýval verður hildið, áðrenn valskeiðið er runnið.